Ինչպե՞ս ընտրել լավ ծորակ. այս հարցի առջև ենք կանգնում յուրաքանչյուրս, երբ վերանորոգում ու կահավորում ենք խոհանոցը կամ սանհանգույցը: Խանութներում առկա տեսականու բազմազանությունն էլ ավելի է դժվարացնում ընտրություն կատարելը: Շատ արտադրողներ շուկային ներկայացնում են արտաքնապես նման կառուցվածքով, սակայն աշխատանքի տարբեր մեխանիզմով ծորակներ: Ու քանի որ ծորակներն առանձնանում են նաև ըստ պատրաստման նյութի, ամրության, գնի, ապա ընտրություն կատարելիս, արտաքին տեսքին ուշադրություն դարձնելուց բացի, պետք է հստակեցնել նաև տեխնիկական մանրամասները, հետո միայն անցնել գնման պրոցեսին: Ներկայացնենք որոշ տեղեկություններ և խորհուրդներ, որոնցով արժե առաջնորդվել ծորակ գնելիս:
ԴԻՄԱՑԿՈՒՆՈՒԹՅՈՒՆ
Ծորակ գնելիս ցանկալի է ընտրել դիմացկուն տարբերակ, որպեսզի կարիք չլինի անընդհատ փոխել ծորակի առանձին մասերը կամ ծորակն ամբողջությամբ: Այս հարցում անշուշտ կարևոր է, թե ինչ նյութից է պատրաստված ծորակը:
- Արույրե ծորակները դիմացկուն են, չժանգոտվող: Արտաքին տեսքն ավելի գրավիչ դարձնելու համար պատվում են նիկելով, էմալով, քրոմով կամ այլ նմանատիպ նյութերով:
- Լեգիրացված պողպատե ծորակներն ունեն լավ արտաքին տեսք, չեն պատվում հավելյալ շերտով, բայց ամրությամբ զիջում են արույրին:
- Պլաստիկե ծորակները մատչելի են, բայց ոչ երկարակյաց: Շատ հաճախ պլաստիկից են պատրաստվում ծորակի առանձին դետալները՝ կափույրները կամ դեկորացիաները:
- Սիլիկոնե ճկվող ծորակներն արույրի պես դիմացկուն չեն, սակայն բավական երկարակյաց են և հարմար հատկապես խոհանոցի համար:
- Կերամիկական ծորակները ամենահազվադեպ հանդիպողն են, դիմացկուն են, համեմատաբար ծանր քաշով:
- Արհեստական քարից պատրաստված ծորակները նորույթ են, երկարակյաց են ու դիմացկուն, նաև՝ մոդայիկ:
ՋՐԻ ՋԵՐՄԱՍՏԻՃԱՆԻ ԿԱՐԳԱՎՈՐՈՒՄ
Ծորակների օգտագործման հարմարավետությունն անմիջականորեն կախված է կոնստրուկցիայի մեխանիզմից, որով կարգավորվում է ջրի ջերմաստիճան: Ըստ այս չափանիշի ծորակները լինում են երեք տեսակի՝ երկկափույր, մեկ կափույրով և կոմբինացված: Բոլոր տարբերակներն էլ նախընտրելի են, հետևաբար ընտրությունը կախված է ձեր նախասիրություններից և բյուջեից:
Երկկափույր ծորակներն ամենատարածվածներն են՝ տաք և սառը ջրի կարգավորման հնարավորությամբ: Կափույրները տեղակայված են աջ ու ձախ կողմերից և տարբերակվում են կարմիր, կապույտ գույներով:
Այս ծորակները համապատասխանում են գրեթե ցանկացած ինտերիերի, մատչելի են, բայց այնքան էլ հարմարավետ չեն, ամեն անգամ օգտագործելիս անհրաժեշտ է լինում կարգավորել ջերմաստիճանը:
Միակափույր ծորակների օգտագործումն ավելի հարմարավետ է: Ջրի հոսքը կարելի է կարգավորել վերև-ներքև շարժումով, ինչպես նաև ջերմաստիճանը՝ աջ-ձախ պտտելով (պտտման անկյունը կարող է 90˚-ից հասնել մինչև 360˚-ի):
Կոմբինացված ծորակները տեղադրվում են լոգարանում՝ ցնցուղին միացվելով համապատասխան խողովակի միջոցով: Ջրի հոսքը կարգավորվում է պտտվող կամ քաշվող դետալով, իսկ ջերմաստիճանը՝ կափույրներով:
Վաճառքում ներկայացված են ծորակների և՛ երկկափույր, և՛ միակափույր մոդելներ: Անկախ կափույրի տարբերակից՝ պետք է նկատի ունենալ, որ բազմաֆունկցիոնալ, շատ դետալներով կոնստրուկցիաները շարքից շուտ են դուրս գալիս: Այդ պատճառով երբեմն ցնցուղի համար տեղադրվում է առանձին ծորակ:
ԴԻԶԱՅՆ ԵՎ ՖՈՒՆԿՑԻՈՆԱԼՈՒԹՅՈՒՆ
Լվացարանի համար մատչելի ծորակ ընտրելիս վերը թվարկվածներով սահմանափակվելը բավարար է: Իսկ եթե առավել կարևորում եք ինտերիերին ներդաշնակ լինելը և հարմարավետությունը, ապա կարելի է ընտրել հետաքրքիր դիզայներական և ֆունկցիոնալ լուծումներով տարբերակներ:
Դիզայնի տեսակետից շուկայում առկա է բավական հարուստ տեսականի՝ կարապ, կոբրա կամ կակաչ հիշեցնող (տյուլպան), գույները՝ սև, սպիտակ, ոսկեգույն կամ մի քանի գույների համադրությամբ. ընտրեք որն ուզում եք:
Ֆունկցիոնալության տեսակետից անհպում՝ սենսորային ծորակները ամենահարմարավետներից են ոչ միայն օգտագործման, այլև ջուրը խնայելու տեսանկյունից: Ծորակն աշխատում է միայն այն ժամանակ, երբ ձեռքը մոտեցնում ենք սենսորին: Առավել հարմար տարբերակ է, երբ նույն կոնստրուկցիան ունի նաև ջրի ջերմաստիճանը կարգավորելու հնարավորություն: Սենսորային ծորակները հարմար են ինչպես խոհանոցում, այնպես էլ լոգասենյակում տեղադրելու համար:
Եվս մեկ ֆունկցիոնալ և օգտագործման համար բավական հարմար տարբերակ են ճկվող քթով ծորակները, որոնք հատկապես հարմար են խոհանոցում օգտագործելու համար, քանի որ թույլ են տալիս ջրի շիթն ուղղել տարբեր անկյուններով, կարգավորել ծորակի հեռավորությունը և լվանալ ցանկացած չափսի սպասք:
Ծորակների տեսականին անշուշտ այսքանով չի սահմանափակվում, սակայն բոլորի մասին մեկ հոդվածում խոսելը գրեթե անհնար է: Հուսով ենք մեր խորհուրդները օգտակար կլինեն լվացարանի ծորակ գնելու հարցում, և դուք գոհ կմնաք ձեր կատարած ընտրությունից:
