Եթե պատրաստվում եք գնել ծորակներ լոգասենյակի, խոհանոցի կամ այլ վայրի համար, անշուշտ ձեզ հետաքրքրում է, թե ծորակի ո՛ր տեսակն է առավել հարմար տվյալ պարագայում: Ճիշտ ընտրություն կատարելու համար անհրաժեշտ է հաշվի առնել այնպիսի գործոններ, ինչպիսեք են հումքը, որից պատրաստված է ծորակը, և մոնտաժման եղանակը, որից էլ կախված է, թե որ տեսակն է առավել հարմար հենց տվյալ վայրում տեղադրելու համար:
ԾՈՐԱԿՆԵՐԻ ՏԵՍԱԿՆԵՐՆ ԸՍՏ ՀՈՒՄՔԻ
Ժամանակակից սանեխնիկայի խանութներում ներկայացված են ծորակներ ամենաբազմազան հումքերով: Ահա՛ այն հիմնական նյութերը, որոնցից պատրաստվում են ծորակները:
- Արույր – Դիմացկուն, չժանգոտվող: Արտաքին տեսքն ավելի գրավիչ դարձնելու համար պատվում է նիկելով, էմալով կամ այլ նմանատիպ նյութերով:
- Լեգիրացված պողպատ – Ունի լավ արտաքին տեսք, պատված չէ հավելյալ նյութի շերտով, բայց ամրությամբ զիջում է արույրին:
- Պլաստիկ – Հիմնականում օգտագործվում է ծորակի առանձին տարրեր, օրինակ՝ բռնակներ կամ դեկորացիաներ պատրաստելու համար:
- Կերամիկա – Ամենահազվադեպ օգտագործվող նյութն է՝ միաժամանակ դիմացկուն, համեմատաբար ծանր քաշով:
- Քար – Պատրաստվում է հիմնականում արհեստական քարից. դիմացկուն է և նորաձև:
ԾՈՐԱԿՆԵՐԻ ՏԵՍԱԿՆԵՐՆ ԸՍՏ ՄՈՆՏԱԺՄԱՆ ԵՂԱՆԱԿՆԵՐԻ
Ծորակի տեղադրման եղանակը կախված է վերջինիս տեսակից: Խնդիրը բավականին հեշտանում է, երբ ծորակը տեղադրվում է կապիտալ վերանորոգման ժամանակ: Նման իրավիճակում շատ ավելի հեշտ է հասկանալ ինչ ծորակ ընտրել՝ ցնցուղով, թե առանց ցնցուղի, պատին ամրացվող թե ներկառուցվող:
Մոնտաժման եղանակից կախված՝ ծորակների հիմնական տեսակները հետևյալն են.
- Ներդրվող ծորակներ: Ամենատարածված ծորակներն են՝ հարմար թե՛ լոգասենյակի, թե՛ խոհանոցի համար: Ծորակի կոնստրուկցիան տեղադրվում է հենց լվացարանի կամ լոգարանի վրա՝ դրա համար նախատեսված խոռոչներում:
- Պատին ամրացվող ծորակներ: Այս ծորակներն ամրացվում են անմիջապես ջրի խողովակներին, որոնք կարող են մնալ պատի ներսում: Հարմար է տեղադրել լվացարանի կամ լոգարանի հենց վերևում՝ ընտրելով ամենահարմար բարձրությունը:
- Ներկառուցվող ծորակներ: Կոնստրուկցիան տեղադրվում է պատի մեջ՝ ծորակի համար նախատեսված հատվածում: Արտաքին հատվածում մնում է միայն ծորակի քիթը և ջրի կարգավորման կափույրները: Ամենից հաճախ կիրառվում է լոգասենյակում, ցնցուղի հետ:
- Հատակին տեղադրվող ծորակներ: Նախատեսված է ընդարձակ լոգասենյակի համար. բարձրադիր ծորակը տեղադրվում է լոգարանի կողքին:
Նշենք, որ թե՛ խոհանոցի, թե՛ լոգասենյակի ծորակների տեղադրման հարցին պետք է մոտենալ հեռատեսորեն, քանի որ հետագայում, փոփոխությունների անհրաժեշտության դեպքում բավականին դժվար կլինի, օրինակ, պատին ամրացվող ծորակը փոխարինել ներկառուցվածով, քանի որ այդ դեպքում ստիպված եք լինելու հեռացնել սալիկները կամ առհասարակ վերափոխել լոգասենյակի կամ խոհանոցի ամբողջ վերանորոգումը:
Որպես ամփոփում նշենք, որ մեր խանութ-սրահում կարող եք ձեռք բերել ծորակների ցանկացած տեսակ, իսկ արդյունավետ և ճիշտ ընտրության հարցում ձեզ կօգնեն մեր փորձառու և բանիմաց խորհրդատուները:
